प्रधानमन्त्रीयात अप्पां क्येकल
राष्ट्रपतियात हाकूगु ध्वाँय्
येँया जात्रा स्वःवनेगु झ्वलय् प्रधानमन्त्री माधवकुमार नेपालयात एकीकृत नेकपा (माओवादी)या कार्यकर्तातय्सं न्युरोडय् अप्पां क्येकूगु दु । उमिसं प्रधानमन्त्री नेपाल विरुद्ध नारा थ्वयेकूसें हाकूगु ध्वाँय् नं क्यंगू खः ।
अथेहे येँया जात्रा स्वःझाम्ह राष्ट्रपति डा. रामवरण यादवयात नं माओवादीया भातृ संगठन नेवाः राष्ट्रिय मुक्ति मोर्चाया कार्यकर्तातय्सं हाकूगु ध्वाँय् क्यंगु दु ।
प्रधानमन्त्रीयात अप्पां क्यकूपिं व हाकूगु ध्वाँय् क्यंपिं नापं राष्ट्रपति यादवयात हाकूगु ध्वाँय् क्यंपिं माओवादी कार्यकर्तातय्त लितु लिनाः प्रहरीं ज्वंगु दु । कुमारी सालीगु लागाःय् व्यापक सुरक्षाकर्मीत छ्यला सुरक्षा व्यवस्था यानातःगु खः ।
नागरिक सर्वोच्चताया पक्षय् आन्दोलन यानाच्वंगु माओवादीं भदौ ११ गते निसें राष्ट्रपति व भदौ १५ गते निसें प्रधानमन्त्रीं ब्वति काइगु ज्याझ्वः आन्दोलनया रुपय् बहिष्कार यानावयाच्वंगु खः ।
