कोइराला आकाझाकां येँय्
स्वन्हुन्यंक आरम यायेत थः गृहनगर विराटनगर झायादिम्ह नेपाली कांग्रेसया सभापति बिहीवाः न्हिनय् आकाझाकां येँय् लिहांझायादीगु दु ।
कांग्रेस सभापति कोइराला प्रधानमन्त्री माधवकुमार नपालं बुधवाः विस्तार यानादीगु मन्त्रिपरिषद प्रति असुन्तुष्ट जूगुलिं वयेक नाप सहलह यायेत प्रधानमन्त्री नेपालया इनापय् विराटनगर भ्रमण चीहाक यानाः येँय् लिहांझायादीगु खँ सिदुगु दु ।
येँय् लिहांझायादी न्ह्यः विराटनगरय् संचारकर्मीत नाप खँल्हाबंला यानादिसें कोइरालां सरकारया आयु प्रधानमन्त्री नेपालया ज्याय् भरपरे जुइगु खँ धयादिल । वयेकलं प्रधानमन्त्रीं बांलागु ज्या याःसा वर्तमान सरकार टिकेजुइगु मखुसाः टिकेमजुइगु धयादिल । वयेकलं सहमति, सहकार्य व एकता बिना देय् न्ह्यने मन्ह्याइगुलिं माओवादी यात नं सहमितलय् वयेकत इनाप यानादिल ।
संचारकर्मीतय्सं सरकारयात टिके यायेगुलि छिगु ल्हाः दुनि धकाः न्यंगु न्ह्यसःलय् कोइरालं धयादिल, - 'जि हे टिके जुइफुगु मदु । जिं सरकारयात गथे यानाः टिके यायेगु ।'
