राजनीतिक पार्टीया ५ लाख कार्यकर्ता
येँ (सन्ध्या टाइम्स)/थीथी राजनीतिक पार्टीया कार्यकर्तातय्त नेपाली जनतां लहिनातःगु खँ अर्थमन्त्री सुरेन्द्र पाण्डें धयादीगु दु ।
वय्कलं उगु खँ नेपाल बायोग्याँस प्रवर्द्धन संघया झिंन्याक्वःगु वार्षिक साधारण सभाया म्हिगः पोखराय् उलेज्या यासें धयादीगु खः ।
वय्कलं नेपाःया थीथी राजनीतिक पार्टीया न्यागू लाख पूर्णकालीन कार्यकर्तात दुगु व उमिगु भरणपोषणया निंतिं राजनीतिक पार्टीतय्सं न्यय्गू लाख नेपाःमि जनतायाके चन्दा फ्वनेमाःगु टिप्पणी यानादीगु खः ।
वय्कलं यदि थ्व फुक्कं कार्यकर्तायात देय् विकास निर्माणया निंतिं छ्यलेगु खःसा याकनं हे देय्या आर्थिक क्षेत्रया ख्वाःपाः हे हिलीगु बिचाः नं वय्कलं प्वंकादीगु दु ।
राजनीतिक पार्टीतय्सं थीथी संघसंस्थाय् ट्रेड युनियनया नामय् युनियन चायेकूगु कारणं उद्योगत बन्द जुइगु अवस्थाय् थ्यंगु धासें देय्या विकासया निंतिं फुक्कं दलत मिले जुयाः आर्थिक क्रान्तिया निंतिं आन्दोलन यायेमाःगु खँ नं धयादीगु दु ।
थ्व स्वयां न्ह्यःया सरकारया स्वयां नं आःया सरकारं राजस्व संकलनय् ५२ प्रतिशत वृद्धिइ जुइगु दावी यानादिसें वय्कलं वंगु दँ अर्थमन्त्री डा. बाबुराम भट्टराईया कारणं राजस्व वृद्धि जूगु मखुसें कर्मचारीया कारणं राजस्व वृद्धि जूगु दाबी नं यानादीगु दु ।
