यँयाःया लसताय् थीथी ज्या
येँ (सन्ध्या टाइम्स)/यँयाःया झ्वलय् थौं कुमारी सालीगु जात्रा जुइत्यंगु दु। थौं मरुं क्वःनेपाखे कुमारी नापं गणेश व भ्यलु (भैरव) या खः साली। थौं कुमारी सालीथाय् राष्ट्र प्रमुख नापं प्रधानमन्त्री व मेपिं विशिष्ट मनूत वइगु ग्वसाः दु। कुमारी साले सिधयेवं थौं हे मरु त्वालं बौमत व दागिं नं पिहां वइ ।
थ्वहे झ्वलय् नेवाः जागरण मञ्चं कन्हय् समय्बजि फ्वनेगु ज्याझ्वः यायेत्यंगु दु। नेवाः संस्कृति ल्यंका तयेत बसन्तपू दबुलिं नेवाः बाजं सहित उगु ज्याझ्वः न्ह्याकीगु खँ मञ्चं धाःगु दु। यँयाःबलय् ;ला छकू वयेक समय्बजि' धकाः समय् - वं वनीगु चलन दु ।
उखे यँयाःया हे लसताय् थौं थनया जनबाहाः पिने '५४ दँ न्ह्यःया स्वनिगः' शीर्षकय् छगू डकुमेन्ट्री ब्वज्या जुइत्यंगु दु। ५४ दँ न्ह्यः खिचे यानातःगु किपात दुथ्याकाः तयार यानातःगु उगु डकुमन्ट्री स्थानीय मछिन्द्र क्लबया ग्वसालय् सनिलया ७ बजे क्यनीगु ज्याझ्वः दु ।
अथे हे मछिन्द्र क्लब व वज्रयोगिनी बचत तथा ऋण सहकारी संस्थाया मंकाः ग्वसालय् नानिचायाः कुन्हु बहनी जनबाहाः पिनेया नासः दबुली महाकाली प्याखं क्यनीगु नं ग्वसाः दु ।
