नेप्से ६ अंकं थहां वन
येँ (सन्ध्या टाइम्स)/नेपाल स्टक एक्सचेन्जय् वंगु छुं दिं न्ह्यः निसें मदिक्क कुहां वनाच्वंगु शेयर कारोबार म्हिगः भचा सुधार जुयाः ५ दशमलव ७७ अंकं थहां वनेवं नेप्से ६६० दशमलव ४ अंकय् थ्यंगु दु। सेन्सेटिभ नं म्हिगःया कारोबारय् सुधार जुयाः २ दशमलव ४ अंकं थहां वंगु दुसा फ्लोट शून्य ७४ अंकं थहां वन ।
म्हिगः नं कारोबार शुरु जुइवं नेप्से कुहां वनेगु क्रम शुरु जूगु खःसा करीब घौछि लिपा नेप्से थहां वनेगु क्रमं कारोबारया अन्त तकं निरन्तरता काःगु खः ।
तःन्हु न्ह्यः निसें कुहां वनाच्वंगु वाणिज्य बैंक समुहया अन्तर्गत म्हिगःया कारोबारय् एभरेष्ट बैंंकया शेयरय् दकलय् अप्वः प्रति कित्ता ११०/-, तका थहां वंगु दुसा अनंलि नेपाल एबीआईया ७०/-, स्टायण्डर्ड चार्टर्डया ६५/- व सिद्धार्थया शेयरय् प्रति कित्ता ४७ तका दां थहां वंगु दु ।
अथे हे मेमेगु वाणिज्य बैंकया शेयरय् नं छन्हु न्ह्यःया कारोबारय् स्वयां थहां वंगु दु। नेप्सेय् कारोबार उपसूचकय् वाणिज्य समुहया उपसूचक नं ११ दशलमव ८८ अंकं थहां वनाः ६७८ दशमलव ६९ अंकय् थ्यंगु दु। लिसें विकास बैंक समुहया उपसूचक नं ताः ई लिपा १ दशमलव ६९ अंकया सामान्य सुधार जुयाः ६९० दशमलव १३ अंकय् थ्यन ।
अथे हे फाइनान्स समुह नं सुधार जुयाः २ दशमलव ९ अंकं थहां वनाः ६५३ दशमलव ५७ अंकय् थ्यन। उखे कुहां वःगु कारोबार मध्ये विमा समुह म्हिगः नं ३ दशमलव ५१ अंकं कुहां वयाः ६३६ दशमलव ४७ अंकय् थ्यंगु दुसा छन्हु न्ह्यः थहां वंगु जलविद्युत समुह म्हिगः नं २ दशमलव २१ अंकं कुहां वयाः ८५६ दशमलव ७२ अंकय् थ्यंगु दु ।
ख्वीखुगू कम्पनीया छगू लाख नीच्याद्वः न्हय्सः व स्वीच्यागू कित्ता न्याये-मी जुयाः म्हिगः च्यागू करोड ख्वीस्वंगू लाख व झिंप्यद्वः तका दांया कारोबार जुल। छन्हु न्ह्यः छगू लाख नीच्याद्वः गुसः व नीनिगू कित्ता शेयरपाखें झिगू करोड न्यय्छगू लाख बराबरया कारोबार जूगु खः ।
एभरेष्ट बैंकया शेयरधनीतय्सं म्हिगः दकलय अप्वः प्रति कित्ता शेयरय् ११०/- तका लबः काःगु दुसा नविल बैंकया प्रमोटर शेयरया शेयरधनीतय्सं प्रति कित्ता १११/- तका द्यापं फयेमाल। अथे हे दांया ल्याखं नविल बैंकं दकलय् अप्वः गुइच्यागू लाख झिंस्वद्वः तका दांया कारोबार याःगु दु ।
