आन्दोलन लित कायेत कोइरालाया इनाप
नेपाली कांग्रेसया सभापति गिरिजाप्रसाद कोइरालां आन्दोलनया ज्याझ्वः लित कायेत नर्सतय्त इनाप यानादीगु दु ।
थीथी माग तयाः आन्दोलनरत नर्सतय् प्रतिनिधित नाप बिहिवाः विराटनगरय् सहलह यानादिसें कोइरालां अति आवश्यक सेवाय् बन्द हडताल यायेगु उचित मजूगु धयादिसें बन्द हडताल लित कायेत इनाप यानादीगु खः । कोइरालां वार्ताया माध्यमं समस्याया समाधान यायेत इनाप यानादिसें सरकार व स्वास्थ्यमन्त्रीं नाप थम्हं नं खल्हांबंला यायेगु आश्वासन बियादिल ।
बुधवाः निसें आकस्मिक बाहेक दक्वं सेवा ठप्प यानाः आन्दोलन न्ह्याकूपिं नर्सतय्सं विहीवाः नं देन्यंकया अस्पातालया उपचार सेवा बन्द याःगु दु । उमिसं नर्सिङ महाशाखा पुनर्गठन यायेमाःगु, नर्सतयत उचित पारिश्रमिक बीमाःगु, स्वास्थ्य ख्यःलय् राजनीतिक हस्तक्षेप बन्द जुइमाःगु लगायतया माग यानाः आन्दोलन यानाच्वंगु खः ।
