आन्दोलनया नांमय् अराजकता जुसाः कारवाही : गृहमन्त्री
गृहमन्त्री भीम रावलं राजनीतिक आनदोलन धासें सार्वजनिक व व्यक्तिगत धनजनया क्षति जुइ कथं अराजक गतिविधि याःसा कानुन कथं कडा कारवाही यायेगु ख्याच्वः बियादीगु दु ।
गृह मन्त्रालयं पोखराय् ग्वसाःग्वःगु पश्चिमाञ्चल स्तरीय सुरक्षा सम्मेलाया बिहीवाः पोखराय् उल्लेज्या यानादिसें वयेकलं राजनीतिक दलया नेता व कार्यकर्तात आपराधिक क्रियाकलापय् संलग्न जूगु लुसाः उमित नं कारवाही यायेगु धयादिसें दक्वंसितं कानुनया दायरा दुने ह्येगु धयादिल । राजनीतिक दलया आवरणय् आपराधिक क्रियाकलाप अप्वयाच्वंगु धयादिसें वयेकलं आपराधिक क्रियाकलापय् संलग्न सुं नं लोकतान्त्रिक मजुइगु व उमिगु छुं हे सिद्धान्त मदइगु धयादिल ।
सरकारं हःगु विशेष योजनायात मधेश विरुद्धया अभियानया कथं आलोचना याःगु प्रति आपत्ति प्वंकादिसें गृहमन्त्री रावलं अज्याःगु आलोचना संकीर्ण स्वार्थ दुपिनिगु द्वपं बियादिल । वयेकलं सरकार सुया नं कतामरी मजूगु धयादिसें कांग्रेस, एमाले नापं चीचीधंगु दलत नं सरकारय् ब्वति कायेधुंकूगुलिं सरकार क्वमदलिगु दाबी यानादिल ।
अथेहे सम्मेलनय् गृहराज्यमन्त्री मोहमद रिजवान अन्सारीं सरकारं विशेष सुरक्षा योजना कार्यान्वयन यायेगु तयारी यानाच्वंगु ईलय् तराईलय् सशस्त्र पुचः पाखें यानाच्वंगु आपराधिक गतिविधित नियन्त्रण जुयाच्वंगु दाबी यानादिल ।
