बन्दं स्वनिगः बाहेकया जनजीवन प्रभावित
संघीय लोकतान्त्रिक राष्ट्रिय मञ्चनाप आबद्ध थीथी च्यागू संगठनतय्सं याःगु नेपाल बन्दया कारणं स्वनिगः बाहेक देयन्यंकया जनजीवन प्रभाति जूगु दु । येँय् परम्परागत येँया जूगुलिं बन्द मयायेत नेवाः संघ संगठनतय्गु इनाप कथं स्वनिगः बाहेक देयन्यंक याःगु खः ।
बन्दया झ्वलय् लिम्बुवान राज्य परिषदं पूर्वया झापा, मारङ, सुनसरी, इलाम, पाँचथर, ताप्लेजुङ लगायत जिल्लात बन्द याकूगु दुसाः थारुहटया कार्यकर्तातय्सं दाङय् चलेजूगु सवारी साधनत नियन्त्रणय् काःगु दु । बन्दया अवज्ञा याःगु धासें थारुहटया कार्यकर्तातय्सं घोराहीलय् झिंछगः मोटरसाइकल व निगः गाडी नियन्त्रणय् काःगु दु । अथेहे बन्दया कारणं देयन्यंकया थीथी जिल्लाया जनजीवन प्रभावित जूगु दुसाः यातायात, कलकारखाना, शिक्षणसंस्था, बजाः आदि पूर्ण रुपं बन्द जूगु दु ।
सरकार व थीथी जातिय संगठनत दथुइ जूगु सम्झौता कार्यान्वयन यायेमाःगु, न्हूगु संविधानय् जातीय ऐतिहासिक पृष्ठभूमि व भाषिक आधारय् आत्मनिर्णयया अधिकार सहित स्वायत्त राज्य सुनिश्चित यायेमाःगु, जातीय जनसंख्याया अधारतय् राज्यया हरेक ख्यलय् पूर्ण समानुपातिक प्रतिनिधित्वया व्यवस्था यायेमाःगु, आदिवासी अधिकार सम्बन्धी संयुक्त राष्ट्र संघीय घोषणा पौ व आईएलओ महासन्धि १६९या कार्यान्वन यायेमा:गु, १९५० लगायत दक्वं असमान सन्धित खारेज यायेमाःगु लगायत माग यासें राष्ट्रिय मञ्चनाप आबद्ध आदिवासी जनजाति, मुस्लिम, दलित संयुक्त संघर्ष समितिं मंका रुपं बन्दया आयोजना याःगु खः ।
