मन्त्रिपरिषद खुक्वःगु पटक विस्तार
मन्त्रिपरिषदया ल्या ४२ थ्यंन
प्रधानमन्त्री माधवकुमार नेपालं बुधवाः खुक्वःगु पटक मन्त्रिपरिषद विस्तार यानादीगु दु ।
बुधवाः विस्तार यानादीगु मन्त्रिपरिषदय् मधेशी जनअधिकार फोरम (लोकतान्त्रिक)या सर्वदेव ओझायात महिला बालबालिका मन्त्री व सदभावना पार्टीया लक्ष्मणलाल कर्णयात विना विभागिय मन्त्रीलय् नियुक्त याःगु दु ।
मन्त्री नियुक्त जुयादिम्ह निम्हेसितं बुधवाः न्हिनय् राष्ट्रपति डा. रामवरण यादवया उपस्थितिइ राष्ट्रपति भवन शितल निवासय् प्रधानमनत्री नेपालं पद व गोपनियताया सपथ ग्रहण याकादीगु खः ।
अथेहे बिस्तारित मन्त्रिपरिषदया राज्यमन्त्रीलय् मधेशी जनअधिकार फोरम (लोकतान्त्रिक)या करिन बेगमयात कृषि राज्यमन्त्री, रामलखन यादवयात महिला व बालबालिका राज्यमन्त्री, शत्रुघन सिंहयात पर्यटन राज्यमन्त्री, चन्द्रेश्वर साहयात भौतिक योजना राज्यमन्त्री व कलावतीदेवी दुसादयात भौतिक सहायक मन्त्रीलय् नियुक्त याःगु दु । अथेहे राष्ट्रिय जनशक्ति पार्टीया इन्द्रप्रसाद ढुङगेलयात विज्ञान सहायक मन्त्रीलय् नियुक्त याःगु दु ।
बुधवाः सरकारं निम्ह मन्त्री, न्याम्ह राज्यमन्त्री व निम्ह सहायक मन्त्री नियुक्त यानाः मन्त्रिपरिषदया ल्या पीनिम्ह थ्यंकूगु दु ।
