स्वम्ह राजदूतया नां सिफारिस

मन्त्रिपरिषदया बुधवाः च्वंगु बैठकं परराष्ट्र सचिव ज्ञानचन्द्र आचार्ययात संयुक्त राष्ट्र संघया स्थायी प्रतिनिधिलय् सिफारिस यायेगु नापं स्वंगू देय्या राजदूत नियुक्त यायेगु निर्णय याःगु दु ।

मन्त्रिपरिषदया बैठकं प्रघुम्नविक्रम शाहयात ब्राजिल, अरुण धितालयात दक्षिण अफ्रिका व मधुवना पौडेलयात कतराया निंतिं राजदूतय् नियुक्ति यायेगु निर्णय याःगु दु । सरकारं सिफारिस याःपिं राजदूतत संसदया विषेश समितिया सुनुवाई लिपा समितिं अनुमोदन यायेधुंकाः तिनि राजदूत जुइ दइगु प्रावधान दु ।

अथेहे मन्त्रिपरिषदया बैठकं वाणिज्य व आपूर्ति मन्त्रालय अर्न्तगतया नेपाल आयल निगमया कार्यकारी निर्देशकय् दिगम्बर झायात निरन्तरता बीगु निर्णय याःगु दु । झायात म्याद निदँया निंतिं थप याःगु खः ।