भारतीय सञ्चारया भाय् हिल
भारतीय जाली नोट प्रकरणय् पुलांम्ह युवराज पारस शाहया नां नं स्वानाः खुब प्रचार यानाच्वंपिं भारतीय सञ्चार माध्यमतय्सं म्हिगः सनिलं निसें थःपिनि भाय् हिलाहःगु दु। आः उमिसं थ्व प्रकरणया प्रमुख नाइके पारस शाह मखु शाहीकालया वन मन्त्री सलिम मियाँ अन्सारीया काय युनुस अन्सारी जक खः धायेगु शुरु याना हःगु दु ।
भारतया 'जागरण' नांगु न्हिपतिइ सुरक्षा एजेन्सीया स्रोतयात न्ह्यथँसें युनुस अन्सारीया नक्कली नोट कारोबारय् दाउद इब्राहिम लिसे समेत स्वापू दु धकाः च्वयाहःगु खः। तर भारतीय सुरक्षा एजेन्सीतय्सं आः तक नं युनुसया विरुद्ध छुं हे प्रमाण मलूनिगु खँ धासें थुकी थःपिं कमजोर जूगु खँ नं स्वीकार याःगु दु ।
