मन्त्रिपरिषद्या खुक्वःगु विस्तार
येँ (सन्ध्या टाइम्स)/ थीथी पार्टीया मन्त्रीत दुथ्याकाः थौं मन्त्रिपरिषदया खुक्वःगु विस्तार जुइत्यंगु दु। मन्त्री जूपिनि नांया बारे सहलह यायेत थौं सुथय् मन्त्रिपरिषद बैठक च्वन।
थौं थीथी पार्टीपाखें सिफारिस जूपिं मन्त्रीत थपे यानाः मन्त्रिमण्डल विस्तार याइगु खँ धाःगु दु ।
थौं निम्ह राज्यमन्त्री व झिम्ह सहायक मन्त्री सहित १२ म्ह मन्त्री थपे याइगु जूगु दु ।
थप जुइपिं मन्त्रीत मध्ये मधेशी जनअधिकार फोरम (लोकतान्त्रिक) पाखें छम्ह राज्यमन्त्री व न्याम्ह सहायक मन्त्री, तराई मधेश लोकतान्त्रिक पार्टीपाखें छम्ह राज्यमन्त्री व छम्ह सहायक मन्त्री, सद्भानापाखें निम्ह सहायक मन्त्री, राष्ट्रिय जनशक्ति पार्टीपाखें छम्ह सहायक मन्त्री व चीधंगु दलतपाखें छम्ह मन्त्री थपे याइगु जूगु दु। न्हापा सरकारय् ३३ म्ह दुजः दुगु खःसा आः ४५ म्ह थ्यनीगु जुयाच्वंगु दु।
माधव नेपालया नेतृत्वय् गठन जूगु वर्तमान सरकारं थःपिनि सछिन्हुया दुने यायेत्यंगु थ्व खुक्वःगु मन्त्रिमण्डल विस्तार खः ।
अथे हे थौं च्वनीगु मन्त्रिपरिषद बैठकं सरकारया सछिन्हुया अवधिइ थीथी मन्त्रालयपाखें याःगु ज्याया बारे नं समिक्षा याइगु खँ धाःगु दु ।
अथे हे उपराष्ट्रपतिया भाषा विवादयात कयाः नं थौंया बैठकय् सहलह याइगु खँ धाःगु दु ।
