मचिकंया खपट स्वात्त हे म्हो
येँ (सन्ध्या टाइम्स)/नेपालय् डिजेल व मचिकंया भाः छगू हे जुइवं मचिकंया खपट स्वात्त हे कुहां वंगु खँ नेपाल आयल निगमया प्रवक्ता मुकुन्दप्रसाद ढुंगेलं कनादीगु दु ।
थौं सुथय् 'सन्ध्या टाइम्स'लिसे खँ ल्हासें वय्कलं आः मचिकंया खपट मासिक ५ हजार किलो लिटर स्वयां म्हो जुयाच्वंगु जानकारी बियादिल। न्हापा मचिकं स्वयां डिजेल थिके जुयाच्वंगु इलय् मचिकं आपालं खपट जुयाच्वंगु खःसा आः भाः छगू हे जुइ सातकि मचिकंया खपट नं कुहां वःगु खँ वय्कलं कनादिल। वय्कलं धयादी, 'आः आवश्यक दुपिंसं जक मचिकं काः वइ। न्हापा डिजेलय् ल्वाकछ्याइगुलिं अप्वः खपट जुयाच्वंगु खः। झीथाय् डिजेलय् मचिकं ल्वाकछ्यायेगु ज्या गुलि अप्वः जुयाच्वंगु लानाच्वन धइगु खँ थुकिं बांलाक हे क्यना बिउगु दु ।'
थौंकन्हय् आयल निगमया मासिक घाटा १९ करोड दुगु जानकारी बिसें वय्कलं पेट्रोल व ग्याँसय् अझ नं निगम घाटाय् वनाच्वंगु खँ नं कनादिल ।
वय्कलं कनादी कथं प्रति सिलिन्डर ग्याँसय् निमगयात ८७.२४ तका घाटा जुयाच्वंगु दुसा पेट्रोलय् प्रतिलिटर ४.७९ तका घाटा जुयाच्वंगु दु ।
