जलवायु सम्मेलनय् नं विवाद
येँ (सन्ध्या टाइम्स)/येँय् जुयाच्वंगु जलवायु परिवर्तन सम्बन्धी छगू सम्मेलनयात क्षेत्रीय सम्मेलन धायेगुलाकि सामान्य सम्मेलन जक धायेगु धइगु समस्या पिहां वःगु दु। दक्षिण एशियाया फुक्क धइथें देय्तय्सं ब्वति कयाच्वंगु 'येँनिसें कोपेनहेगन तक' शीर्षकया उगु सम्मेलनय् भारतपाखें सुं हे जिम्मेवार पदाधिकारीं ब्वति मकाःगु कारणं थ्व समस्या पिहां वःगु खः। भारतपाखें जिम्मेवार पदाधिकारी मवःगु कारणं सम्मेलनं पारित याइगु घोषणापत्रय् सही यायेत हे समस्या जुयाच्वंगु दु। यदि थुकी भारतया हे सही मंत धाःसा सम्मेलनयात क्षेत्रीय सम्मेलन तकं धाये फइगु खः वा मखु धइगु न्ह्यसः समेत पिहां वःगु खः ।
सूत्रया कथं जलवायु परिवर्तन सम्बन्धी थज्याःगु हे छगू क्षेत्रीय सम्मेलन भारतं नं यायेगु धकाः ग्वसाः ग्वयातःगु खः। तर भारतय् जुइ न्ह्यः नेपालय् सम्मेलन जूगुलिं भारतं जिम्मेवार मनू छ्वयामहःगु खः। सम्मेलनय् थौं नेपालं थःपिनि ज्यापौ न्ह्यब्वइगु व थौं हे सम्मेलन क्वचाइगु ग्वसाः दु ।
