सिद्धिदास बुन्हि तःजिक हनीगु

येँ (सन्ध्या टाइम्स)/महाकवि सिद्धिदास महाजुया १४२ दँ बुन्हि दँय्दसं थें थुगुसी नं तःजिक हनीगु जूगु दु। थ्वहे वइगु यंलागा दुतिया (भदौ २१ गते) आइतवाः कुन्हु सुथय् नसंचा उलाः महाकविया बुन्हि हनेगु ज्याझ्वः नेपालभाषा मंकाः खलकं दयेकूगु दु ।

अथे हे वकुन्हु हे न्हिनय् महाकविया लुमंतिइ छन्दं चिनातःगु कविता पाठया ज्याझ्वः नं याइगु ग्वसाः दु। आइतवाः न्हिनसिया ३ बजे आशा सफूकुथी उगु ज्याझ्वः जुइ। ज्याझ्वलय् नेपालभाषाया थीथी कविपिंसं छन्द कविता पाठ यानादी ।