कारोबार थहां वंसां नेप्से क्वय्
येँ (सन्ध्या टाइम्स)/नेपाल स्टक एक्सचेन्जय् जूगु शेयर कारोबार छन्हु न्ह्यःया तुलनाय् थहां वंसा नेप्से धाःसा कुहां वंगु दु। म्हिगः नं अधिकांश वाणिज्य बैंकया शेयर कारोबारय् भाः कुहां वयेवं नेप्से नं कुहां वःगु खः। वंगु छुं दिं न्ह्यः निसें नेप्से लगातार कुहां वनाच्वंगु दु ।
वाणिज्य बैंक समुह अन्तर्गत म्हिगःया कारोबारय् एभरेष्ट बैंंकया शेयरय् प्रति कित्ता ९०/-, नविल बैंकया ८०/-, हिमालयन बैंकया ७३/-, नेपाल एबीआईया ६५/-, स्टायण्डर्ड चार्टर्डया ६०/- व बीओकेया ४०/- तका दां कुहां वन ।
अथे हे मेमेगु वाणिज्य बैंकया शेयरय् नं भाः कुहां वंगु दु। वाणिज्य बैंकया शेयर कारोबारय् सुधार वयेमफयेवं मदिक्क कुहां वनाच्वंगु नेप्से थ्व वालय् निन्हुया दुने २० अंकं कुहां वंगु खःसा म्हिगःया कारोबारय् ६ दशमलव ४ अंकं कुहां वनाः समग्र नेप्से परिसूचक ६५४ दशमलव ६३ अंकय् थ्यंगु दु। उखे सेन्सेटिभ २ दशमलव ४७ व फ्लोट शून्य दशमलव ८७ अंकं कुहां वन ।
कारोबार जूगु उपसूचक मध्ये नेप्सेय् अप्वः प्रभाव लाकीगु वाणिज्य बैंक समुह दकलय् अप्वः ११ दशमलव ५९ अंकं कुहां वयाः ६६७ दशमलव ८१ अंकय् थ्यंगु दु। विकास बैंक समुह नं ७ अंकं कुहां वयाः ६८८ दशमलव ४४ अंकय् थ्यन। अथे हे फाइनान्स समुह ७ दशमलव ५६ अंकं कुहां वनाः ६५० दशमलव ६७ अंकय् व विमा समुह शून्य दशमलव ९३ अंकं कुहां वनाः ६९३ दशमलव ९८ अंकय् थ्यंगु दु। म्हिगःया कारोबारय् थहां वंगु छगू जक उपसूचक जलविद्युत सकुहअ जुल। थुगु समुह ४ दशमलव ३१ अंकं थहां वनाः ८५८ दशमलव ९३ अंकय् थ्यंगु दु ।
ख्वीनिगू कम्पनीया छगू लाख नीच्याद्वः गुसः व नीनिगू कित्ता शेयर न्याये-मी जुयाः झिगू करोड न्यय्छगू लाख व न्हय्न्याद्वः तका दांया कारोबार जूगु दु। म्हिगः पीछगू कम्पनीया कारोबार कुहां वंगु दुसा झिंप्यंगूया जक कारोबारय् थहां वंगु दु। ल्यं न्हय्गू कम्पनीया कारोबारय् धाःसा छुं हिउपाः वःगु मदु ।
नविल बैंकं म्हिगःया कारोबारय् दांया ल्याखं दकलय् अप्वः छगू करोड पीगू लाख सझंखुद्वः तका दांया कारोबार याःगु दु।
