ज्याकेट प्रकरणया बारे छानविन यायेत समिति गठन
सुडानय् शान्ति स्थापनार्थ खटेजुयाच्वंपिं नेपाल प्रहरीया निंतिं न्याःगु ज्याकेटय् अनियमितता जूगु बारेय् अध्ययन यायेत व्यवस्थापिका संसद राज्य व्यवस्था समितिं न्याम्ह दुजः दुगु समिति गठन याःगु दु ।
समिमिया बुधवाः सुथय् च्वंगु बैठकं नेकपा (एमाले)या सभासद् प्रदीप ज्ञवालीया संयोजकन्तय् समिति गठन याःगु खः । समितिलय् माओवादीया भीमप्रसाद गौतम, कांग्रेसया जगदीशनरिसंह केसी, फोरम (लोकतान्त्रिक)या रामजनम चौधरी व नेमकिपाया लीला न्याइँच्याई दुजः कथं च्वनादीगु दु ।
नेपाल प्रहरीं सुडान शान्ति मिसनया निंतिं न्याःगु ज्याकेटया गुणस्तरया बारे न्ह्यसः थंसें संयुक्त राष्ट्र संघं नेपाल सरकारयात पौ छ्वयाहेवं व्यवस्थापिका संसदया लेखा समिति व राज्य व्यवस्था समितिं उकी च्यूताः प्वंकूगु खः ।
बैठकय् उपस्थित गृहमन्त्री भीम रावलं दोषी लुसाः न्ह्याम्हेसित जुसां कारवाही यायेत सरकार तयार जूगु धयादिल । वयेकलं थुकीया बारे छानबिन यायेत मन्त्रालयं ग्वाहालि यायेगु प्रतिबद्धता प्वंकादिल ।
