संविधान निर्माण यायेगु ज्या तीव्र गतिं न्ह्याइ : प्रधानमन्त्री
प्रधानमन्त्री नेपालयात हाकूगु ध्वाँय्
प्रधानमन्त्री माधवकुमार नेपालं स्वलाः निसें खाली जुयाच्वंगु संवैधानिक समितिया सभापतिया चयन जुइधुंकूगुलिं संवैधानिक समितिया ज्या तीव्र गतिं न्ह्याइगु विश्वास प्वंकादीगु दु ।
सुनसरीया धरानय् मंगलवाः उद्योग वाणिज्य संघया ज्याकू शिल्यन्यास यानादिसें प्रधानमन्त्री नेपालं सेना समायोजन विषेश समितिया पुनर्गठन नं जूगुलिं आः सेना समायोजन सम्बन्धी ज्या नं याकनं जुइगु धयादिल । वयेकलं समितिया न्हापांगु बैठक च्वनेधुंकूगु व थुकीं सेना समायेजन सम्बन्धी ज्या तदारुक्ताया साथ याइ धयादिल ।
अथेहे नागरिक सर्वोच्चताया माग यासें आन्दोलनरत एकीकृत नेकपा (माओवादी)या कार्यकर्तातय्सं उद्योग वाणिज्य संघया ज्याकू शिल्यन्यास यायेत सुनसरीया सिंहदेवी चोक थ्यंकादिम्ह प्रधानमन्त्री नेपालयात ज्याझ्वः जुयाच्वंगु थासय् हे हाकूगु ध्वाँय् क्यंगु खः । अथेहे माओवादी कार्यकर्तातय्सं प्रधानमन्त्री धरान वनेगु झ्वलय् इटहरीलय् नं हाकूगु ध्वाँय् क्यंगु दु ।
माओवादींतय्सं थःपिनि आन्दोलनया ज्याझ्वः कथं सोमवाः निसें प्रधानमन्त्री नेपालया सार्वजनिक ज्याझ्वः बहिष्कार यायेगु ज्याझ्वः क्वछिनातःगु खः ।
