'उपराष्ट्रपति पदया निंतिं निर्वाचनया मिति क्वछित माग'
नेपाल मजदुर किसान पाटीया अध्यक्ष नरायणमान बिजुक्छे 'रोहितं' उपराष्ट्रपतिया पद स्वत खाली जूगुलिं निर्वाचनया मिति घोषणा यायेमाःगु खँ धयादीगु दु ।
सोमवाः ख्वपय् संचारकर्मीत नाप खँल्हाबंला यानादिसें नेता बिजुक्छें सर्वोच्च अदालतं सपथ कायेत ब्यूगु न्ह्यन्हु पुलेधूकूगु व उपराष्ट्रपतिं समयसिमा दुने सपथ मकाःगुलिं वयेकया पद स्वत खाली जुइधुंकूगुलिं मेम्ह उपराष्ट्रपतिया निंतिं मिति तत्काल क्वछिमाः धयादिल ।
सर्वोच्च अदालतया फैसला पलना मयायेगु उपराष्ट्रपति परमानन्द झाया पलाःयात 'पागलपन'या संज्ञा बियादिसें अध्यक्ष बिजुक्छें उपराष्ट्रपति पदं बर्खास्त जुइधुंकूम्ह झायात वहे पदय् तयातयेत आः राजनीतिक सहमति यायेमज्यूगु बिचाः प्वंकादिल ।
संचारकर्मीत नाप खँल्हाबंला यायेस्वयां न्ह्यः बिजुक्छें जिल्ला विकास समिति ख्वपं ग्वसाःग्वःगु आर्थिक दँ ०६५/६६या बार्षिक प्रगति समिक्षाया उल्लेज्या यानादिसें स्थानीय निकायया विकास स्वयेत स्थानीय निकाय पुनः स्थापना यायेमाः धयादिल । वयेकलं जनप्रतिनिधि मदुतल्ले स्थानीय स्तरय् विकास जुइमफइगु धयादिल ।
