नागरिक सर्वोच्चता कायम जुयातुं त्वःति : प्रकाश

एकीकृत नेकपा (माओवादी)या उपाध्यक्ष नारायणकाजी श्रेष्ठ 'प्रकाशं' नागरिक सर्वोच्चताया निंतिं शुरु जूगु आन्दोलन निष्कर्षय् थ्यनाः नागरिक सर्वोच्चता कायम जुयातुं त्वःतिगु खँ धयादीगु दु । राष्ट्रपतिं थःगु पलाः मिभंकुतल्ले सतकं निसें सदन तक न्ह्याःगु आन्दोलन छुं नं हालतं माओवादीं लित मकाइगु धयादिल ।

कार्यकर्ता प्रशिक्षणया निंतिं मंगलवाः रुकुम वने न्ह्यः नेपालगाजय् पार्टीया कार्यकतात नाप खँल्हाबंला यानादिसें नेता प्रकाशं छुं विदेशी तत्वत संविधान निर्माण यायेमबीगु पक्षय् लगेजुयाच्वंगु द्वपं बियादिसें उकीया विरुद्ध नं माओवादीया आन्दोलन केन्द्रीत जूगु धयादिल ।

वर्तमान सरकार नाप छुं नं सहमतिया सम्भावना मदुगु धयादिसें माओवादी उपाध्यक्ष प्रकाशं माओवादीया राष्ट्रिय सरकार गठनया विकल्प मदुगु दाबी यानादिल ।