समितिया प्रतिवेदन लःल्हात
येँ (सन्ध्या टाइम्स)/ गुथि संस्थानया औचित्य व नेवाः संस्कृति हनेज्याय् वयाच्वंगु समस्या बारे अध्ययन यायेत सरकारं गठन यानातःगु उच्चस्तरीय अध्ययन समितिं थौं थःपिनि प्रतिवेदन लःल्हात। थौं सुथय् हनुमानध्वाखा नासः चुकय् छगू ज्याझ्वः यासें समितिया संयोजक पवित्र बज्राचार्यं संघीय मामिला, संसदीय व्यवस्था, संविधान सभा तथा संस्कृति मन्त्री डा. मिनेन्द्र रिजालयात लःल्हानादिल।
प्रतिवेदन कयाःलि मन्त्री डा. रिजालं आः थःपिंसं उकिया बारे अध्ययन यानाः छु याये फइ यायेगु जुइ धयादिल। वय्कलं उद्यमी नेवाःतय्गु कारणं हे थौं नेपाःया नां विश्वय् न्यनाच्वंगु बिचाः नं प्वंकादिल ।
ज्याझ्वःया सभापति व उच्चस्तरीय समितिया संयोजक पवित्र बज्राचार्यं अध्ययनया झ्वलय् नेवाः संस्कृति न्ह्याकेगु ज्याय् गुथि संस्थानया औचित्य मदु धइगु हे लिच्वः वःगु दु धासें नेवाः जात्रा पर्व बांलाक न्ह्याकेगु निंतिं अलग्ग निकाय आवश्यक दु धयादिल। थुकिया निंतिं थःपिंसं ऐनया मस्यौदा समेत तयार यायेधुनागु व उगु ऐन पारित यानाः लागू यायेत नं इनाप यानादिल ।
अध्ययन समितिया दुजः सुजीव बज्राचार्यं लसकुस यासें मन्त्रालययात बुझे यानागु प्रतिवेदन लागू मयात धाःसा अझ मेगु संघर्ष यायेत नेवाःत बाध्य जुइ धयादिल।
संस्कृति मन्त्रालयया सचिव व समितिया सदस्य सचिव प्रकाश दर्नालं सुभाय् देछानादीगु खः ।
