खुलाया दुने सेना समायोजन
येँ (सन्ध्या टाइम्स)/वइगु खुलाया दुने माओवादी लडाकुया समायोजन यायेगु कथं थौं च्वंगु सेना समायोजन विशेष समितिया बैठकं सहलह ब्याकूगु दु ।
प्रधानमन्त्री माधव नेपालयात अध्यक्ष दयेकुसें समितियात पूर्णता बीवं थौं न्हापांगु बैठक च्वंगु खः। सेना समायोजन विशेष समितिया बैठकं प्राविधिक समितिया म्याद स्वला तनेगु निर्णय नं याःगु दु ।
म्हिगः समितिं पूर्णता कायेवं थौं सुथय् च्वंगु न्हापांगु बैठकं समितिया आगामी कार्यदिशाया बारे नं सहलह ब्याकूगु खः।
बैठकं थ्व स्वयां न्ह्यः गठन यानातःगु प्राविधिक समितिया ज्याया मूल्यांकन यासें अनमिनं अयोग्य ठहर याःपिं माओवादी सेनाया व्यवस्थापन लगायतया विषयय् नं सहलह ब्याकूगु खः ।
समितिया मेगु बैठक भदौ २१ गते च्वनेगु नं क्वःछिउगु दु।
माओवादी अध्यक्ष प्रचण्डं प्रधानमन्त्री पदं राजीनामा बीवं प्वनाच्वंगु समितिया अध्यक्ष न्हापा माओवादीं थःपिंत हे बीमाःगु दाबी याना वयाच्वंगु खः ।
उखे थौं च्वंगु संवैधानिक समितिया बैठकं अवधारण व मस्यौदा तयार यायेत १९ म्ह दुजः दुगु छगू समिति स्वंगु दु। समितिं थ्वहे वइगु भदौ २१ गते दुने अवधारणा तयार याइगु खँ धाःगु दु ।
