बाहारे पुखुलीइ द्वलंद्वः न्या सित
ख्वप (सन्ध्या टाइम्स)/ थनया कमल विनायक बाहारे पुखुलीइ स्थानीय उपभोक्ता समितिं लहिनातःगु नीद्वः स्वयां अप्वः न्या आकाझाकां सीवं उगु थाय् तसकं दुर्गधित जुइक नवःगु दु। पुखूया लखय् न्यायात माक्वः अक्सिजन मगाना न्या सीगु खँ विज्ञतय्सं धाःगु दु ।
पुखूया लः परीक्षण यानाच्वंगु ख्वप कलेज एमएस्सी वातावरण संकायया विद्यार्थी जय प्रजापतिं लखय् अक्सिजनया मात्रा म्हो जूगुलिं न्या सीगु दावी यानादिल ।
पुखुली लः म्हो जक जुयाः न्या सीवं आः अन पम्पं लः सालाः लः तयाच्वंगु दु। न्या सीवं अनया लः नाष्टय् यंकाः नं परीक्षण यानाच्वंगु दु ।
निन्हु न्ह्यःनिसें न्या सीगु शुरु जुइवं उगु पुखुली बिष तयातःगु आशंका स्थानीय जनतां याःगु खःसा द्वलंद्वः सीपिं द्वलंद्वः न्या फुक्कं गाः म्हुयाः ल्हानाछ्वःगु खः ।
तःपुखूया लखय् प्रति लिटर साढे ५ मिलीग्राम अक्सिजन दुगुलिं अन न्या म्यायेफुगु व बाहारे थनया पुखूया लखय् १.५ मिलीग्राम जक अक्सिजन दुगुलिं न्या सीगु खँ धाःगु दु। न्या सीवं अन सीपिं न्या स्वयेत आपालं मनूत वःगु खःसा गुलिस्या नवःगु न्या तकं ज्वनावंगु दु ।
आः पुखुली ध्याचलय् च्वनेफुपिं चिचीधिकःपिं न्या बाहेक तःधिकःपिं न्या मदयेधुंकूल। थ्व चीधकःपिं न्या धाःसा प्रति लिटर लखय् १ मिलीग्राम अक्सिजन जक दुसां नं म्वाये फइगु खँ सम्बन्धित विज्ञतय्सं धाःगु दु ।
न्हापा येँय्या न्हूपुखुली नं लः मदया न्या सीगु खः ।
