म्हिगः नं नेप्से १० अंकं कुहां वन
येँ (सन्ध्या टाइम्स)/नेप्से कुहां वनेगु क्रम यथावत हे जुयाच्वंगु दु। लगातार शेयर कारोबारय् वयाच्वंगु र्हासया कारणं म्हिगः नं नेप्से १० दशमलव १२ अंकं कुहां वयाः शून्य ३ अंकय् थ्यंगु दु। छन्हु न्ह्यःया कारोबारय् नं नेप्से झण्डै समान अंकं हे कुहां वःगु खः। सेन्सेटिभ छन्हुया कारोबारय् थें हे समान ३ दशमलव २८ अंकं व फ्लोट १ अंकं कुहां वंगु दु ।
छन्हु न्ह्यःया कारोबारय् स्वयां म्हिगः जूगु कारोबारय् शेयर संख्या व दांया कारोबार थहां वंसां नेप्से थहां वने मफुत। कारोबार जूगु वाणिज्य बैंकत मध्ये म्हिगःया कारोबारय् नं अप्वः धइथें वाणिज्य बैंकया शेयर भाः कुहां वःगु दु। म्हिगःया कारोबारय् निगू जक वाणिज्य बैंकया शेयरय् सामान्य भाः थहां वंगु दुसा छगूया भाः यथावत हे जुल। मेगु दक्वं बैंकया भाः कुहां वनेवं नेप्से नं कुहां वःगु खः ।
कारोबार जूगु उपसूचकय् वाणिज्य समुह १३ दशमलव २६ अंकं कुहां वयाः ६७९ दशमलव ४ अंकय् थ्यंगु दु। विकास बैंक समुह नं ४ दशमलव ४२ अंकं कुहां वयाः ६९४ दशमलव ८९ अंकय् थ्यंगु दु। दकलय् अप्वः जलविद्युत समुह १८ दशमलव १२ अंकं कुहां वयेवं ८५४ दशमलव ६२ अंकय् थ्यन
।
उखे छन्हु न्ह्यःया कारोबारय् थहां वंगु निगूलिं समुहया उपसूचक म्हिगःया कारोबारय् धाःसा कुहां वःगु दु। फाइनान्स समुह ४ दशमलव ६८ अंकं कुहां वयाः ६५८ दशमलव २ अंकय् व वीमा समुह शून्य दशमलव १९ अंकं कुहां वयाः ६४० दशमलव ९१ अंक थ्यंगु दु ।
ख्वीप्यंगू कम्पनीया छगूलाख च्याद्वः सछि व न्हय्न्यागू कित्ता शेयर न्याये-मी जुयाः च्यागू करोड गुइन्हय्गू लाख चय्गुद्वः तका दांया कारोबार जुल। छन्हु न्ह्यः छगूलाख सछि व झिंखुगू कित्ता शेयरपाखें खुगू करोड पीछगू लाख न्यय्स्वद्वः तका दांया कारोबार जूगु खः ।
म्हिगः नं शेयर कारोबारय् भाः कुहां वंसा बैंक अफ काठमाण्डु (बीओकें) दकलय् अप्वः छगू करोड स्वप्यंगू लाख न्हय्गुद्वः तका दांया कारोबार याःगु दु ।
