उपराष्ट्रपति थ: हे समस्या : ओली
नेकपा (एमाले)या नेता केपी शर्मा ओलीं उपराष्ट्रपति परमानन्द झा थंज्याम्ह देय्या समस्या समाधान यायेमाःम्ह व्यक्ति थः हे समस्या जुयाबीगू खँ धयादीगु दु ।
मंगलवाः विराटनगरय् संचारकर्मीत नाप खँल्हाबंला यानादिसें नेता ओलीं संक्रमणकलाया ईलय् देशय् छुं समस्या जुसाः उकीया समाधान यायेत उपराष्ट्रपितं पहल यायेमाःगुलि उपराष्ट्रपति झां हे थाकूगु वातावरण श्रृजना याःगु द्वपं बियादिल ।
उपराष्ट्रपति संविधान स्वयां च्वये मजूगु व सर्वोच्च अदालतया फैसला स्वयां नं च्वये मजूगु धयादिसें नेता ओलीं संविधान व अदालतया सम्मान यायेत उपराष्ट्रपतिया इनाप यानादिल । वयेकलं दक्वं भाषा सम्मान जूगुलिं विकासया ह्वताः चूलाकेमाःगु तर अनुपयुक्त कथं थुकीयात छ्यले मज्यू धयादिल ।
राष्ट्रपतियात जबरजस्ति विवादय् हःगु, उपराष्ट्रपति थः हे विवाद वःगु, बैधानिक सरकारयात अवैधानिक धइगु थंज्याःगु अराजक ज्यां समस्या झन जटिल याःगु धयादिसें थंज्याःगु नाटक त्व:ताः संविधान निर्माणय् लगेजुइमाःगु खँ बः बियादिल ।
