संविधान संशोधन याः : मधेशवादी दल
सत्ता साझेदार स्वंगू मधेशवादी दलतय्सं उपराष्ट्रपति परमानन्द झाया सपथ सम्बन्धी विवादया समाधनया निंतिं तत्काल संविधान संशोधन यायेमाःगु निष्कर्ष पिकाःगु दु ।
मधेशी जनअधिकार फोरम (लोकतान्त्रिक), तराई-मधेश लोकतान्त्रिक पार्टी व सदभावना पार्टीया सोमवाः च्वंगु बैठकं संविधान संशोधनया निंतिं संसदया अवरोध चीकेत प्रमुख प्रतिपक्षि दल एकीकृत नेकपा (माओवादी) नाप इनाप यायेगु निर्णय नं याःगु दु ।
संसदय् मां भासं सपथ कायेगु प्रावधान सहितया अन्तरिम संविधानय् न्ह्यक्वःगु पटक संशोधनया प्रस्ताव दर्ता जुइधुंकूगु दुसां संसदय् जुयाच्वंगु अवरोधया कारणं संसदय् प्रवेश जुइफुगु मदुनि । प्रधानसेनापति यात थमौति यायेगु राष्ट्रपतिया पलाः विरुद्ध आन्दोलनरत माओवादीया कारण व्यवस्थापिका संसदया बैठक अवरुद्ध जुयाच्वंगु दु ।
सिंहदरवारय् च्वंगु सदभावना पार्टीया संसदीय दलया ज्याकूथी च्वंगु बैठक लिपा पिथंगु विज्ञप्तिइ उपराष्ट्रपतिया सपथ प्रकरणय् सर्वोच्च अदालतया फैसलां देय् द्वन्द्व पाखे उन्मुख जुयाच्वंगु धासें च्यूता प्वंकूगु दु । बैठकं व्यवस्थापिका संसदय् न्ह्यब्वःगु विधेयक पारित याकेत संविधानसभाय् दुगु दक्वं दलत नाप इनाप यायेगु निर्णय नं याःगु दु ।
