स्वंगूगु पक्षयात विमा मंगलवाः निसें
सवारी दुर्घटनालिपा जुइगु बन्द-हड्ताल, चक्काजाम थंज्याःगु गतिविधि नियन्त्रण यायेत सरकारं आर्थीक दँ २०६६/६७या वजेट मार्फत हःगु स्वंगूगु पक्षया विमा ज्याझ्वः मंगलवाः निसें लागु जुइगु जूगु दु ।
स्वंगूगु पक्षिय विमा स्वरुप सवारी साधनया ठक्करं यात्रु घाःपा व सीसाः एकमुष्ठ ध्यबाः दइगु व्यवस्था दु ।
विमा समिति व अर्थमन्त्राल दथुइ सोमवाः सिंहदरवारय् जूगु सहमति कथं सवारी साधनया ठक्करं घाःपा जुसाः वास याकेत निगू लाख तका व सीसा: पीडित पक्षया छेँजःयात न्यागू लाख तका बीगु ज्याझ्वः मंगलवाः निसें लागु जुइत्यंगु खः ।
भदौ १ गते निसें लागु जुइ धासां नं ऐन अभावया कारणं स्वंगूगु पक्षिय विमा मंगलवाः निसें जक लागु जुइत्यंगु खः । विमा समिति नापया सहमति लिपा अथेमन्त्री सुरेन्द्र पाण्डें स्वंगूगु पक्षिय विमां राजमार्गय् बन्द-हड्ताल थंज्याःगु ज्या मजुइगु विश्वास प्वंकादीगु दु ।
