थनिंनिसें प्रधानमन्त्री नं बहिष्कार
येँ (सन्ध्या टाइम्स)/ प्रधानसेनापति प्रकरणय् राष्ट्रपतिया विरुद्ध आन्दोलन याना वयाच्वंगु नेकपा (माओवादीं) थनिंनिसें प्रधानमन्त्रीयात नं सार्वजनिक ज्याझ्वलय् बहिष्कार याइगु जूगु दु ।
वंगु छुं न्हि न्ह्यः तक राष्ट्रपतियात सार्वजनिक बहिष्कार यानावःपिं माओवादीं थनिंनिसें प्रधानमन्त्रीयात नं बहिष्कार यायेगु ज्याझ्वः पित हःगु खः ।
बहिष्कार ज्याझ्वः कथं प्रधानमन्त्री संलग्न जूगु छुं नं ज्याझ्वलय् माओवादीया नेतात उपस्थित मजुइगु खँ माओवादीं धाःगु दु ।
अथे हे प्रधानमन्त्रीयात बहिष्कार यायेगु झ्वलय् प्रधानमन्त्री वनीगु हरेक सार्वजनिक ज्याझ्वलय् माओवादी कार्यकर्तातय्सं हाकुगु ध्वाँय् क्यनीगु जूगु दु।
उखे थौं माओवादीया ज्याकू कोटेश्वरय् स्थायी समितिया बैठक च्वनाच्वंगु दु ।
बैठकय् प्रधानसेनापति प्रकरणय् माओवादीं घोषणा याःगु आन्दोलन, लिपांगु राजनीतिक परिस्थिति व उपराष्ट्रपतिं खय् भासं शपथ मकायेधुंकाः ब्वलंगु परिस्थितियात कयाः नं सहलह ब्याकीगु खँ धाःगु दु ।
अथे हे बैठकं संयुक्त राष्ट्रिय जनआन्दोलन समितिं मार्फत याइगु आन्दोलनयात अझ तच्वयेकेत थीथी ब्यूरोया गठन याये फइगु जानकारी माओवादीं सूत्रं बिउगु दु। माओवादीं डा. बाबुराम भट्टराईया नेतृत्वय् उगु समिति नीस्वनातःगु खः ।
