पशुपतिइ संघर्ष समिति स्वन
येँ (सन्ध्या टाइम्स)/पशुपतिइ हानं भारतीय पुजारी हे नियुक्त यायेगु तयारी जुयाच्वंगु कारणं स्थानीय जनतां उकिया विरोध याःगु दुसा म्हिगः छगू संघर्ष समिति नं गठन याःगु दु। डा. ऋषि शर्माया अध्यक्षताय् गठन याःगु पुजारी नियुक्ति संघर्ष समितिइ २७ म्ह दुजः दु ।
पशुपतिइ पुजा याकेगु लागिं सरकारं निम्ह भारतीय पुजारी येँय् हया नं तयेधुंकूगु दु। उमित पशुपतिइ पुजा याके बी मखु धकाः स्थानीय जनतां विरोध याःसां सम्बद्ध मन्त्रीं तप्यंक हस्तक्षेप यानाः अन पुजा याके बिउ धकाः आदेश बिउगु खँ धाःगु दु। मन्त्री थेंज्याःम्ह मनुखं भारतीय नागरिकयात पुजारीया रोजगारी बिउ धकाः आदेश बियाहःगुलिं स्थानीय जनता तम्वयाच्वंगु दु। उमिसं आः पशुपतिइ पुलांगु हे परम्परा कथं नेपाली पुजारीयात पुजा याये माःगु माग याःगु दु। उमिसं म्हिगः पशुपति विकास कोषया ज्याकुथी तालं ग्वया बिउगु खःसा थौं प्रचार प्रसार व हस्ताक्षर अभियान न्ह्याकेगु खँ धाःगु दु ।
