वाःया शुरुइ हे १० अंकं कुहां वन
येँ (सन्ध्या टाइम्स)/नेप्सेय् लगातारवयाच्वंगु र्हासया कारणं थुकिया लगानीकर्ता जक मखसे आम नागरिकयात बिचाः यायेमाःगु विषय दयेका बिउगु दु। वंगु वाःया लिपांगु न्हिपाखे छुं भचा सुधारया संकेत खनेदयेवं नेप्सें हाकनं गति काइगु खनेदुगु खःसा थुगु वाःया शुरुइ हे नेप्से हाकनं कुहां वंगु दु ।
नेप्से म्हिगः जूगु कारोबारय् निगु जक वाणिज्य बैंक बाहेकं मेगु दक्वंया शेयर भाः कुहां वल। किस्ट बैंकया भाः यथावत हे जुलसा नेपाल एसबीआई बैंक छगूया जक सामान्य थहां वन। म्हिगःया कारोबारय् नविल बैंकया दकलय् अप्वः प्रति कित्ता ११७/- तका व बीओकेया १११/- तका कुहां वन।
कारोबार जूगु दक्वं बैंकया भाः कुहां वनेवं नेप्से म्हिगः १० दशमलव ३९ अंकं कुहां वयाः ६७१ दशमलव १५ अंकय् थ्यंगु दु। सेन्सेटिभ नं ३ दशमलव २४ अंकं व फ्लोट १ दशमलव १६ अंकं कुहां वल ।
कारोबार जूगु उपसूचकय् नेप्से अप्वः प्रभाव लाकीगु वाणिज्य समुह १०६ दशमलव शून्य ९ अंकं कुहां वयाः ६९२ दशमलव ६६ अंकय् थ्यन। अथे हे विकास बैंकपाखें नं निगूया कारोबार यथावत व निगूया समान्य थहां वनेवं थुगु समुह नं ८ दशमलव ५३ अंकं कुहां वयाः ६९९ दशमलव ३१ अंकय् थ्यंगु दु। जलविद्युत समुह २ दशमलव शून्य ५ अंकं कुहां वयेवं ८७२ दशमलव ७४ अंकय् थ्यंगु दु ।
उखे थहां वंगु उपसूचकय् फाइनान्स समुह शून्य दशमलव शून्य ९ अंकं सामान्य सुधार जुयाः ६६२ दशमलव ८८ व वीमा समुह नं शून्य दशलवम ८४ अंकया सामान्य सुधार जुयाः ६४१ दशमलव १ अंकय् थ्यंगु दु ।
म्हिगः कारोबार जूगु कम्पनीत मध्ये पीनिगू कम्पनीया कारोबार कुहां वंगु दुसा झिप्यंगू कम्पनीया जक कारोबार थहां वन। खुगु कम्पनीया कारोबार यथावत हे जूगु दु। मुक्कं छगूलाख सछि व झिंखुगू कित्ता शेयरपाखें खुगू करोड पीछगू लाख न्यय्स्वद्वः तका दांया कारोबार जुल ।
शेयर कारोबारय् भाः कुहां वंसा बैंक अफ काठमाण्डु (बीओकें) दकलय् अप्वः चय्न्हय्गू लाख पीस्वद्वः तका दांया कारोबार यात ।
