उपराष्ट्रपतिया निर्णय दुर्भाग्यपूर्ण : खनाल
यादवं उपराष्ट्रपतिया निर्णयया प्रशंसा
नेकपा (एमाले)या अध्यक्ष झलनाथ खनालं उपराष्ट्रपति परमानन्द झां खस् भासं सपथ माकेयेगु निर्णय याःगु दुर्भाग्यपूर्ण जूगु टिप्पणी यानादीगु दु ।
विराटनगर विमानस्थलय् पत्रकारतनाप सोमवाः खँल्हाबंला यनादिसें अध्यक्ष खनालं सपथ प्रकरणं सरकार सकंटय् लाःगु मखसें उपराष्ट्रपति हे संकटय् लाइगु धयादिसें वयेकलं उपराष्ट्रपति झायात सर्वोच्च अदालतया फैसला स्वीकार यायेत नं सुझाव बियादिल ।
वयेकलं उपराष्ट्रपतिया सपथ सर्वोच्च अदालतया आदेश व फैसलाया आधारय् जुइमाःगु खँय् बः बियादिसें उपराष्ट्रपतिया मेमेगु विषयलय् राष्ट्रिय सहमतिया आधारय् निर्णय जुइगु धयादिल ।
मेखे मधेशी जनअधिकार फोरमया अध्यक्ष उपेन्द्र यादवं धाःसा उपराष्ट्रपति झां खस् भासं हानं सपथ मकाःगुलिं उपराष्ट्रपतिया प्रशंसा यनादीगु दु ।
सोमवाः सुथय् वीरगञ्जय् ग्वसाःग्वःगु छगू पत्रकार सम्मेलनय् फारम अध्यक्ष यादवं भाषिक स्वतन्त्रताया निंतिं उपराष्ट्रपतिं ल्ह्वंगु पलाः प्रशंसायोग्य जूगु धयादिसें सर्वोच्चया निर्णय अलोकतान्त्रिक जूगु धयादिल । वयेकलं उपराष्ट्रपतिया निर्णयया लसकुस यानादिसें बधाई नं बियादिल ।
पत्रकार सम्मेलनय् फोरम अध्यक्ष यादवं थ्व समस्या न्यायिक क्षेत्राधिकार दुने मलाइगुलिं थुकीया राजनीतिक रुपं हल यायेमाःगु बिचाः प्वंकादिल । वयेकलं मेमेगू मधेशवादी दलतय्सं लिप्पांगु ईलय् खस् भासं हे उपराष्ट्रपतियात सपथ कायेत याःगु इनापया विरोध यानादिसें धयादिल, 'थ्व माधव नेपालं ब्यूगु जागिर बचेयायेगु कुतः जक खः ।'
