मधेशवादी दलतय्सं कोइराला नापलात
सत्ता साझेदार मधेशवादी दलतय्सं नेपाली कांग्रेसया सभापति गिरिजाप्रसाद कोइराला नाप नापलाना उपराष्ट्रपति परमानन्द झाया सपथ प्रकरण बारे निकास मालेत इनाप याःगु दु ।
सोमवाः कोइराला निवास महाराजगंज थ्यंकाः उपप्रधानमन्त्री नापं मधेशी जनअधिकार फोरम (लोकतान्त्रिक)या अध्यक्ष विजयकुमार गच्छदार, तराई-मधेश लोकतान्त्रिक पार्टीया अध्यक्ष महन्थ ठाकुर व सदभावना पार्टीया अध्यक्ष नापं आपूर्तीमन्त्री राजेन्द्र महत्तों सपथ प्रकरणया बारे याकनं स्वयां याकनं निकास मालेत इनाप याःगु खः ।
खँल्हाबंलाय् मधेशवादी नेतातय्सं संविधानय् याकनं संशोधन यानाः मां भासं नं सपथ कायेदइ कथं व्यवस्था यायेमाः बिचाः प्वंकूगु खः । उगु ईलय् कांग्रेस सभापति कोइरालां संसदया गतिरोध अन्त्य यानाः संविधान संशोधन यायेत मेमेगू दल नाप याकनं सहलह यायेगु आश्वासन बियादीगु खः ।
