'विषेश सुरक्षा योजनाया विरोध याइपिं लोकतन्त्र विरोधी'
गृहमन्त्री भीम रावलं कानुनया उल्लंघन याइपिं सुयातनं सरकारं मत्वतीगु ख्याच्वः बियादीगु दु ।
हेटौंडाय् जूगु सुरक्षा सम्बन्धी क्षेत्रीय सम्मेलनया सोमवाः उल्लेज्या यानादिसें गृहमन्त्री रावलं कानुन उल्लंघन याइम्ह न्ह्यक्वः हे शक्तिशाली व राजनीतिक दल हे जुसां कारवाही यायेगु प्रतिबद्धता प्वंकादीगु दु ।
सरकारं हःगु विषेश सुरक्षा योजना जनआन्दोलनं प्राप्त याःगु लोकतन्त्रयात बचे यायेत, ईलय् हे न्हूगु संविधान निर्माण यायेत, जनताया हक अधिकार सुनिश्चित यायेत व देय्या सार्वभौम राष्ट्रियता व अखण्डतायात उच्च यायेत जूगु धयादिसें थुकीया विरोध याइपिं लोकतन्त्रया विरोधी जूगु द्वपं बियादिल । वयेकलं लोकतान्त्रिक गणतन्त्रया रक्षार्थ विशेष सुरक्षा ज्याझ्वः तयार याःगु धयादिल ।
ज्याझ्वलय् गृह राज्यमन्त्री रिजवान अन्सारीं तराईया जनतां सुरक्षा माग यानाच्वंगु व सुरक्षा ज्याझ्वयात लसकुस याःगु धयादिसें छुं अराजक पुचलं धाःसा थुकी भ्रम ब्वलंकच्वंगु टिप्पणी यानादिल ।
सम्मेलनय् नेपाल प्रहरीया प्रमुख रमेश चन्द, सशस्त्र प्रहरीया प्रमुख सनत बस्नेत, राष्ट्रिय अनुसन्धान प्रमुख अशोकदेव भट्ट लगायत नारायाणी व जनकपुरया सुरक्षा प्रमुखतय् ब्वति दुगु खः ।
