चिनियाँ नेता येँय्

चिनियाँ कम्युनिष्ट पार्टीया पोलिटब्युरो दुजः चाङ्ग गाओली झिंन्ह्यम्ह दुजः दुगु चिनिया प्रतिनिधिमण्डलया नेतृत्व यासें सोमवाः सुथय् येँय् थ्यंकादीगु खः । वयेकयात त्रिभुवन विमानस्थलय् परराष्ट्र मन्त्रालयया सचिव ज्ञानचन्द्र आचार्य व एमाले नेता केपी शर्मा ओलीं लसकुस यानादीगु खः ।

नेपाल सरकारया ब्वनाय् न्यान्हुन्यंकया नेपाः भ्रमणय् झायादिम्ह चाङ्गं राष्ट्रपति डा. रामवरण यादव, प्रधानमन्त्री माधवकुमार नेपाल, परराष्ट्रमन्त्री सुजाता कोइराला, प्रमुख प्रतिपक्षी दलया नेता व एकीकृत नेकपा (माओवादी)या अध्यक्ष पुष्पकलम दाहाल 'प्रचण्ड', नेपाली कांग्रेसया सभापति गिरिजाप्रसाद कोइराला व नेकपा (एमाले)या अध्यक्ष झलनाथ खनालनाप नापलाइगु खँ नेपाः स्थित चिनियाँ दूतावासं धाःगु दु ।