छवाःया दुने नेप्से २१ अंकं क्वय्
येँ (सन्ध्या टाइम्स)/नेपाल स्टक एक्सचेन्जय् थ्व वालय् जूगु शेयर कारोबारय् समग्र नेप्से परिसूचक न्हापांगु न्हिया तुलनाय् २० दशमलव ६८ अंकं कुहां वन। वाःया न्हापांगु न्हि ७०२ दशमलव २२ अंकं शुरु जूगु कारोबार वाःया लिपांगु न्हि ६८१ दशमलव ५४ अंकय् थ्यंकाः कारोबार बन्द जुल ।
थुगु छवाःया दुने चय्च्यागू कम्पनीया ५८२० कारोबारं मुक्कं न्यय्छगू करोड नीन्हय्गू लाख नीनिद्वः तका दां बराबरया खुगू लाख चय्च्याद्वः व न्हय्सः कित्ता शेयर न्याये-मी जुल। थ्व स्वयां छवाः न्ह्यः ५४७७ कारोबारय् च्यागू लाख चय्च्याद्वः व न्हय्सः कित्ता शेयर न्याये-मी जुयाः ख्वीस्वंगू करोड ख्वीन्यागू लाख न्हय्प्यद्वः तका दांया कारोबार जूगु खः ।
थ्व वालय् कारोबार ल्याः थहां वंसां दांया ल्याखं धाःसा वंगु वालय् जूगु कारोबार स्वयां कुहां वल। दांया ल्याखं थ्व छवाःया दुने १९ दशमलव ४६ प्रतिशतं कुहां वःगु दु ।
अथे हे 'क' वर्गया कारोबार मापन यायगु सेन्सेटिभ इन्डेक्स नं थुगु वालय् न्हापांगु न्हिया तुलनाय् ७ दशमलव ७२ अंकं कुहां वयाः वाःया लिपांगु न्हि १८० दशमलव २१ अंकय् थ्यन।
'क' वर्गय् लाःगु कम्पनीया जक थ्व वालय् स्वीनिगू करोड नीप्यंगू लाख तका दांया कारोबार जुल। थ्व नेप्सेय् जूगु कूल कारोबारया ६२ दशमलव ८९ प्रतिशत खः ।
थ्व वालय् दकलय् अप्वः दां खुगू करोड न्यय्प्यंगू लाख तका कारोबार याःगु आधारय् स्टायण्डर्ड चार्टर्ड बैंक, दकलय् अप्वः शेयर न्हय्खुद्वः कित्ता शेयर न्याये-मी जूगु आधारय् नेशनल हाइड्रो पावर व दकलय् अप्वः द्वःछि व ख्वीच्याक्वः च्यागू कारोबार याःगु आधारय् सिटिजनस बैंक इन्टरनेशनल न्ह्यःने लात। थ्व वालय् सृजना फाइनान्सया हकप्रद शेयर नेपाल धितोपत्र बोर्डय् सूचीकृत जुल ।
