हानं सपथ कायेगु ज्याझ्वःलय् उपराष्ट्रपति अनउपस्थित
उपराष्ट्रपति परमानन्द झा आइतवाः न्हिनय् राष्ट्रपति भवन सितल निवासय् हानं सपथ कायेगु ज्याझ्वःलय् उपस्थित जुयामदी । सपथया निंतिं सरकारं न्हिनय् ४ बजेया ई क्वछिनातःगु खः ।
प्रधानमन्त्री माधवकुमार नेपाल, सभामुख सुवासचन्द्र नेम्वाङ, मन्त्रीत लगायत संवैधानिक अंगया प्रमुखत उपराष्ट्रपति झायात हानं सपथ कायेगु ज्याझ्वःलय् ईलय् थ्यंकूगु खः । उपराष्ट्रपति झायात १ घण्टा पियानं मवेवं प्रधानमन्त्री नेपालं वयेकयात सपथ काः वयेत इनाप यासे फोन यानादीगु खः । तर उपराष्ट्रपति झां थः हानं सपथ मकायेगु लिसः प्रधानमन्त्रीयात बिवं प्रधानमन्त्री लगायत संवैधानिक अंगया प्रमुखत अनं लिहांवःगु खः ।
थ्वस्वयां न्ह्यः आइतवाः हे उपराष्ट्रपति झां छगू पत्रकार सम्मेलन यानाः सर्वोच्च अदालतया आदेश असंवैधानिक जूगु दाबी नं यानादिसें हानं खस् भासं सपथ मकायेगु जानकारी बियादीगु खः ।
