भारतीयत थना छ्वयेत सक्रिय
येँ (सन्ध्या टाइम्स)/ झापाया निगू वडाय् अतिक्रमण यानाः च्वनाच्वंपिं भारतीय नागरिकतय्त उगु थासं चिला वनेत स्थानीय प्रशासनं ७२ घौया अल्टिमेटम बिउगु दु। म्हिगः अनया बस्ति चीकेत नेपाली सुरक्षा अधिकारी सहितया पुचलं भारतीय सीमा सुरक्षा बलया अधिकारी व भारतया किसनगञ्ज जिल्लामा पञ्चायतया प्रमुख सहितयात बस्ति चीकेत उगु अल्टिमेटम बिउगु खः ।
लिसलय् भारतीय पक्षं थःगु देय्या नागरिकत दैवी बिपत्तिइ लाःगुलिं थःपिनि नागरिक अन च्वनेत बाध्य जूगु धासें उमिगु वैकल्पिक बसोबासया व्यवस्था यायेत झिंन्यान्हुया ई फ्वंगु खः ।
तर नेपाली पक्षं धाःसा उमित अनं ७२ घौया दुने हे चिला वनेत अल्टिमेटम बियागु खँ तमलोपाया केन्द्रीय दुजः विजयकुमार अग्रवालं कनादीगु दु ।
छुं न्हि न्ह्यः कन्काई खुसिइ वःगु खुसिबालं विस्थापित जुयाः नेपाःया भूभागय् वयाः च्वनाच्वंपिं भारतीय नागरिकयात चीकेत वंगु प्रहरीया पुचःयात भारतीय नागरिकतय्सं आक्रमण याःगु खःसा उगु आक्रमणय् लानाः नेपाःया प्रहरी हवल्दार दानबहादुर खड्का घाःपाः जूगु खः ।
नेपाः व भारतया उगु सिमानाय् नेपाःया जनता व भारतीय सुरक्षा बल एसएसबीया जवानतय् दथुइ इलय् ब्यलय् ल्वापु जुइगु याः। भारतीय सुरक्षा बल इलय् ब्यलय् नेपाःया लागाय् दुहां वइगु खः ।
