प्रमया चीन भ्रमणया नं तयारी
येँ (सन्ध्या टाइम्स)/प्रधानमन्त्री माधव नेपालयात थौं चिनियाँ राजदूत क्यू गो होङं नापलानादीगु दु। उगु झ्वलय् वय्कःपिनि दथुइ प्रमं यानादीत्यंगु चीन भ्रमणयात कयाः सहलह जूगु खँ धाःगु दु। प्रम नेपालं उकुन्हु तिनि भारतया भ्रमण यानादीगु खःसा उगु भ्रमण लिपा चिनियाँयात थौं नापलानादीगु खः ।
अथे हे चिनियाँ राजदूत होङं नेपालय् जुयाच्वंगु चीन विरोधी गतिविधि नियन्त्रण मजूगु खँय् चिउताः प्वंकादीगु खः। लिसलय् प्रम नेपालं थःपिंसं जःलाखःला देय्या विरुद्ध नेपाःया भूमि गुगुं नं कथं छ्यले मबीगु बचं बियादीगु खः।
अथे हे उगु खँल्हाबल्हाया झ्वलय् राजदूत होङं नेपालय् न्ह्यानाच्वंगु शान्ति प्रक्रिया व वर्तमान राजनीतिक परिस्थितियात कयाः नं सहलह यानादीगु खः।
प्रम नेपाल संयुक्त राष्ट्रसंघया महासभाय् ब्वति कायेत न्युयोर्क वनेत्यंगु दु। अनं लिहां वयाखतं वय्कः चीनया भ्रमणय् झाइगु ज्याझ्वः दु ।
