ज्याझ्वः स्वःवःपिंत फसि व लौका सिरपाः
येँ (सन्ध्या टाइम्स)/थुगुसी सापारुया लसताय् लाकाः ख्यालिगुलु गुथिपाखें म्हिगः थनया पर्यटन बोर्डया हलय् छगू ख्यालिन्हिलि ज्याझ्वः यात ।
म्वःम्वः स्वकुमितय् दथुइ न्ह्याःगु उगु ब्वज्याय् ख्यालः, म्येँ, हुलाप्याखं, मुक्तक व जादूया ब्वज्या समेत जूगु खः।
झीथाय् न्ह्यागु छगू जक जूसां चक्का जाम याइगु चलन दु। लँय् वयाच्वंम्ह खिचाया मचा छम्ह क्यलाः सितं नं चक्का जाम जुयाः हैरान जूगु बाखं दु ख्यालः 'जितः विपाशा माल' य्। अथे हे देय्या फुक्क जनताया ल्हातय् 'गन' हे मदुसा गय् यानाः गणतन्त्र जुइ धइगु ब्यंग दु 'जुकि जुकि' ख्यालःलय्। उकथं हे भ्रष्ट नेतातय्त अपहरण यायेगु ग्वसाः दु ख्यालः 'अपहरण' य् ।
ज्याझ्वलय् 'ब्याः यानागु झिंन्यान्हु मदुनि....' म्येँया बोलय् न्ह्यब्वःगु हुलाप्याखं नापं मेगु स्वपु हुलाप्याखं नं स्वकुमिपिनि नुगः साला काःगु खनेदत। मचाम्ह कलाकार सुरभि श्रेष्ठया प्याखंपाखें प्रभावित जुयाः बाखंच्वमि लक्ष्मण राजवंशीं ला अन हे द्वःछि दां सिरपाः तकं लःल्हानादिल। अथे हे थुगुसी न्ह्यब्वःगु म्येँ, मुक्तक व जादूं नं गाक्कं मनोरंजन बिल ।
ज्याझ्वलय् पाहांपिंपाखें हे गोला प्रथां रमिला जोशीयात सभा नायः व मोक्षबहादुर अमात्ययात मू पाहां ल्यःगु खःसा सभानायःपाखें रिमोट कन्ट्रोलं फसि पालाः ज्याझ्वःया उलेज्या याःगु खः ।
अथे हे ज्याझ्वः क्वचायेकाः स्वम्ह स्वकुमियात गोला प्रथां छगः लौका, छगः फसि व छगः आकर्षक बट्टा सिरपाः देछाःगु खः। ज्याझ्वलय् ख्यालिगुथिया नायः गणेशराम लाछिं सकसितं सुभाय् देछानादीगु खः ।
