उपराष्ट्रपतिं हानं खस् भासं सपथ मकाइगु
उपराष्ट्रपति परमानन्द झां हानं खस् भासं सपथ मकायेगु खँ धयादीगु दु ।
आइतवाः न्हिनय् छगू पत्रकार सम्मेलन यानाः उपराष्ट्रपति झां अन्तरिम संविधानया न्ह्यक्वःगु संशोधन व्यवस्थापिका संसदय् विचारधिन जुयाच्वंगु धयादिसें उगु संशोधन पारित जुइधुंका जक सपथ कायेगु खँ धयादिल ।
वयेकलं मां भासं सपथ कायेगु व्यवस्था मजुतल्ले सपथ मकायेगु बिचाः दयेकाःगु धयादिल, - 'हाल संविधानसभाय् बिचारधीन जूगु संविधानया न्ह्यक्वःगु संशोधन बिधेयकयात सरकार व संविधानसभां पारित यानाः नेपालय् न्ववाइगु दक्वं मां भाय् यात सम्मान यायेधुंकाः जक जिं हानं सपथ कायेगु विषयलय् बिचाः यायेफइ ।'
उपराष्ट्रपति झां थम्हं सपथ कायेधुंकूगुलिं हानं सपथ कायेगुया छुं अर्थ मदइगु खँ धयादिल । पत्रकार सम्मेलनय् वयेकलं थःगु पदं राजीनामा बीगू वा मबूगु बारे छुं धयामदी ।
वयेकलं जातिय व भाषिक खँ देया तसं संवेदनशीन खँ जूगु धयादिसें सर्वोच्चया आदेशं भाषिक विवाद सिर्जना याःगु द्वपं बियादिल । वयेकलं सर्वोच्चया फैसलां संविधानया मर्म, लोकतन्त्रया मान्यता व जनताया मौलिक हकय् प्रहार याःगु धयादिसें सर्वोच्चया निर्णया संकीर्ण जूगु धयादिल ।
थ्वस्वयां न्ह्यः आइतवाः सुथय् च्वंगु मन्त्रिपरिषदया बैठकं सर्वोच्च अदालतया आदेश बमोजिम उपराष्ट्रपति झायात हानं सपथ कायेत इनाप यासें ४ बजे सपथ कायेगु ई क्वःछिउगु खः । आइतवाः हे सपथ प्रकरणया बारे मधेशवादी दलया शीर्ष नेतातय्सं राष्ट्रपति डा. रामवरण यादव व उपराष्ट्रपति झा नापलाना निकास मालेगु कुतः याःगु खः ।
सर्वोच्च अदालतया पूर्ण इजलासं भदौ ७ गते उपराष्ट्रपति झायात न्ह्यन्हु दुने हानं खस् भासं सपथ कायेत निर्देशन ब्यूगु खः । यदि न्ह्यन्हु दुने हानं सपथ मकासाः वयेकया कार्यभार निष्कृय जुइगु पदय् च्वनाच्वने मिलेमजूगु धकाः ठहर सर्वोच्चं याःगु खः ।
