सहमतिया निंतिं पहल न्ह्याकेत आचार्ययात इनाप
संविधानसभा संवैधानिक समितिया दुजःतय्सं ईलय् हे न्हूगु संविधान जारी यायेत उच्चस्तरीय राजनीतिक सहमति आवश्यक जूगु धासें उकीयात आवश्यक वातावरण निर्माण यानाबीत समितिया न्हुम्ह सभापति निलाम्वर आचार्ययात इनाप याःगु दु ।
आचार्य सभापति पदय् निर्वाचित जुइधुंका न्हापांगु पटक आइतवाः च्वंगु समितिया बैठकय् दुजःतय्सं कार्यतालिका बमोजिम संविधान दयेकेत तत्काल उच्च राजनीतिक तहलय् सहमति व सहकार्य आवश्यक जूगु बिचाः प्वंकूगु खः । दुजःतय्सं सहमतिया निंतिं प्रमुख दलया शीर्ष नेतात नाप परामर्श यानाः बल्लाःगु राजनीतिक संयन्त्र निर्माण यायेगु वातावरण सिर्जना यायेत सभापति आर्चाययात इनाप याःगु खः ।
बैठकय् दुजत भीम रावल, प्रकाशमान सिंह, सरीता गिरी लगायतं संविधानसभाया थीथी उपसमितिलय् खनेदुगु विवाद व फरक मतयात ईलय् हे मिले यायेमाःगु खँय् नं बः ब्यूगु खः ।
