खस् भासं हे सपथ कायेत उपराष्ट्रपतियात सरकारया इनाप
सर्वोच्चया निर्णय विरुद्ध तराईलय् प्रदर्शन
नेपाल सरकारं उपराष्ट्रपति परमानन्द झायात खस् भासं सपथ कायेत औपचारिक इनाप याःगु दु ।
आइतवाः सुथय् च्वंगु मन्त्रिपरिषदया बैठकं सर्वोच्च आदलतं निर्देशन ब्यूगु कथं खस् भासं हे सपथ कायेत इनाप याःगु दु । मुक्कं नीगू मिनेट जक च्वंगु मन्त्रिपरिषदया बैठकय् उपराष्ट्रपति झायात छपू पौ छ्वया थ्व इनाप याःगु खः । अथेहे बैठकं राष्ट्रपति डा. रामवरण यादवयात नं छपू पौ च्वयाः उपराष्ट्रपति झायात खस् भासं सपथ कायेकेत इनाप याःगु दु । कनुन मन्त्री प्रेमबहादुर सिंह उपराष्ट्रपति झायात आइतवा: न्हिनय् ४ बजे सपथ कायेगु व्यवस्था या:गु जानकारी बियादिल ।
थ्वस्वयां न्ह्यः सर्वोच्च अदालतं उपराष्ट्रपति झायात खस् भासं न्ह्यन्हु दुने सपथ कायेत निर्देशन ब्यूगु खः । उगु निर्देशन कथं यदि न्ह्यन्हुया दुने सपथ मकासाः उपराष्ट्रपतिया पद निष्कृय जुइगु खँ न्ह्यथंनातःगु खः । थौं सर्वोच्चं उपराष्ट्रपतियात सपथ कायेत ब्यूगु ईया लिप्पां न्हि खः ।
अथेहे मधेशवादी दलया विद्यार्थी संगठनतय्सं सर्वोच्च अदालतं उपराष्ट्रपति झायात हानं खस् भासं सपथ कायेत ब्यूगु निर्देशनया विरोध यासें तराईया थीथी जिल्लाय् प्रदर्शन यानाच्वंगु दु । प्रदर्शया कारणं तराईया सुनसरी, नवलपरासी, जनकपुर, वीरगाज आदि थाय्या जनजीवन प्रभावित जूगु दु ।
