चालू अधिवेशनय् हे व्यक्ति वेपत्ता बिधेयक : शान्तिमन्त्री
शान्तिमन्त्री रकम चेम्जोङं संसदया गतिरोध याकनं अन्त्य जूसाः चालू अधिवेशनय् हे व्यक्ति बेपत्ता सम्बन्धी बिधेयक पारित यायेगु प्रतिबद्धता प्वंकादीगु दु ।
अन्तराष्ट्रिय वेपत्ता सम्बन्धी दिवसया लसताय् आइतवाः थीथी च्यागू राष्ट्रिय व अन्तराष्ट्रिय अधिकारवादी संस्थाया प्रतिनिधित नाप खँल्हाबंला यानादिसें वयेकलं बिधेयकया निंतिं सरोकारवाला पक्षपाखें प्राप्त सुझावयात दुथ्याकेगु बचं बियादिल ।
मन्त्री चेम्जोङं मानवता विरोधी अपराध सम्बन्धय् दलत दथुइ मंकाः मत दयेकेत ग्वाहालि यायेत अधिकारवादी संस्थाया प्रतिनिधित नाप इनाप यानादिल । उगु ईलय् अधिकारवादी संस्थाया प्रतिनिधितय्सं अन्तराष्ट्रिय मापदण्ड कथं बिधेयकय् मदुगु प्रावधन दुथ्याकेत इनाप यासें ज्ञापन पौ लःल्हाःगु ख: ।
अथेहे २६क्वःगु अन्ताराष्ट्रिय बेपत्ता दिवसया लसताय् नेपाः स्थित थीथी देया राजदूतावसं छगू मंकाः विज्ञप्ति पिथंसें सरकार व विद्रोही पक्षं बेपत्ता यापिं नागरिकत मालेत तत्काल आयोग गठन यानाः छानबिन प्रकृया न्ह्याकेत सरकार नाप इनाप याःगु दु ।
अन्तराष्ट्रिय रेडक्रसया तथ्यांक कथं नेपाःया राज्य व विद्रोही पक्षं १३४८ नागरिकत बेपत्ता यानातःगु दु ।
