प्रधानमन्त्रीं थःगु अधिकार राष्ट्रपतियात लःल्हात : गौतम
नेकपा (एमाले)या उपाध्यक्ष वामदेव गौतम राष्ट्रपतिया बारे व्यवस्थापिका संसदय् सहलह यायेदयेमाःगु धयादिसें वर्तमान प्रधानमन्त्रीं थगु अधिकार नं राष्ट्रपतियात लःल्हाःगु द्वपं बियादीगु दु ।
विराटनगरय् पत्रकारत नाप खँल्हाबंला यानादिसें एमाले नेता गौतमं सैनिक सर्वोच्चता लागू यायेगु कुत जुयाच्वंगु धयादिसें आ: नागरिक सर्वोच्चताया हनन जूगु धयादिल । राजतन्त्रया बिचाः दुपिं प्रतिगामीतय्सं सदनय् थ्व विषयलय् सहलह याये मबीयाच्वंगु द्वपं बियादिसें राष्ट्रपतिया बारे सहलह छाय् यायेमदइगु धकाः न्ह्यसः तयादिल ।
माओवादीयात नापं मज्वंसें संविधानया छगः आखः नं च्वये मफइगु धयादिसें गौतमं दकलये तःधंगु पार्टीयात छखे तया संविधान निर्माण यायेगु धइगु हाँस्यासपद जूगु धयादिल । वयेकलं दक्वं मिले यानाः दुइ तिहाइ नं मगाइगु दलतय्सं एक तिहाइ दुगु पार्टीयात छखे तयाः संविधान च्वयेगु धइगु घाटक जूगु टिप्पणी यानादिल ।
वयेकलं माओवादी, एमाले व कांग्रेस छथाये हे च्वना राष्ट्रिय सरकार गठन यानाः देय्यात संभावित दुर्घटना पाखें जोगे यायेमाःगु खँय् बः बियादिल ।
