उपराष्ट्रपति झा खस् भासं सपथ कायेत तयार
उपराष्ट्रपति परमानन्द झां खस् भासं सपथ कायादीगु जूगु दु । सरकारया पाखें प्रधानमन्त्री माधवकुमार नेपालं सर्वोच्च अदालतया आदेश बमोजिम सपथ कायेत पौ छ्वःगु कन्हय् कुन्हु हे वयेक थ्व विषयलय् सकारात्मक खनेदुगु खः ।
शनिवाः सुथय् प्रधानमन्त्री माधवकुमार नेपाल नाप जूगु खँल्हाबंलाया झ्वलय् वयेकलं मन्त्रिपरिषदया इनाप कथं खस् भासं सपथ कायेगु धयादिल । गौरीघाटय् च्वंगु थःगु छेँय् प्रधानमन्त्री नेपाल नाप खँल्हाबंला यानादिसें वयेकलं राष्ट्रियतायात थम्हं न्ह्यवलें सर्वोपरी रुपं स्वीकार यानाःगु धयादिसें राष्ट्रिय अखण्डताय् आँच लाइ कथंया ज्या थम्ह गवलें मयानाःगु धयादिल ।
वयेकलं राष्ट्रियता लिपा जक राजनीति व व्यक्ति जुइगु धयादिसें सपथयात कया याःगु अनावश्यक विवाद प्रति च्यूता प्वंकादिल । अथेहे प्रधानमन्त्री नापया खँल्हाबंलाय् वयेकलं सर्वोच्चय् पुनारावलोकनया निंतिं दर्ता याःगु निवेदनया विषयलय् नं सहलह जूगु खः ।
सर्वोच्चं उपराष्ट्रपति झायात खस् भासं सपथ कायेत ब्यूगु ई आइतवाः क्वचायेत्यंगु दु ।
अथेहे प्रधानमन्त्री नेपालं शुक्रवाः किरात जनवादी वर्कर्स पार्टीं उपराष्ट्रपतिया छेँ नापसं याकूगु बम विस्फोट क्षतिया बारे निरीक्षण यानादिसें अपराधीयात कडा कारवाही यायेगु धयादिल ।
