उपराष्ट्रपतिया छेँ नापसं बम विस्फोट / प्रधानमन्त्रीपाखें भर्त्सना
उपराष्ट्रपति परमानन्द झाया गौरघाटय् च्वंगु छेँ नापसं शुक्रवाः सनिलय् बम विस्फोट जूगु दु । वयेकया छेँ स्वयां ५० मिटर तापाक्क बम विस्फोटन जूगु खः । बम विस्फोट लिपा अनया सुरक्षा स्थित कडा याःगु दु । बम विस्फोट जूगु ईलय् उपराष्ट्रपति झा धासाः छेँय् मदुगु खसाः विस्फोट पाखें छेँय् छुं क्षति धाःसा मजू ।
विस्फोटया जिम्मा किरात जनवादी वर्कर्स पार्टीं काःगु दु । पार्टीया अध्यक्ष नवीन किरातीं एटिभीयात फोन यानाः विस्फोटया जिम्म काःगु खः ।
बम विस्फोटयात कया प्रधानमन्त्री माधवकुमार नेपालं भर्त्सना व निन्दा यानादीगु दु । प्रधामन्त्री नेपालं छगू विज्ञप्ति पिथंनादिसें समाजय् अस्थिरता, अराजकता, भय-त्रास व आतंक सिर्जना यायेगु ताः तयाः याःगु थंज्याःगु जघन्य आपराधिक घटनाय् संल्गन तत्वयात अविमम्ब मालाः कडा स्वयां कडा कारवाही यायेत नेपाल सरकार दृढ जूगु खँ न्हयथंनादिसें थंज्याःगु अपराधय् संलग्न न्ह्याम्ह जुसां सरकारं छुं नं हालतं मत्वतीगु धयादिल ।
