प्रधानमन्त्रीं उपराष्ट्रपतियात सर्वोच्चया आदेश कार्यान्वयन यायेत इनाप
प्रधानमन्त्री माधवकुमार नेपालं उपराष्ट्रपति परमानन्द झायात सर्वोच्च अदालतया आदेशया कार्यान्वयन यानाः खय् भासं सपथ ग्रहण यायेत इनाप यानादीगु दु ।
शुक्रवाः उपराष्ट्रपति झायात छपू पौ च्वयाः राष्ट्रपति व उपराष्ट्रपति लगायत सार्वजनिक पदय् च्वनीपिंसं थःगु मां भासं पद व गोपनीयताया सपथ कायेगु अधिकारया व्यवस्था संविधानय् दुथ्याकेत अन्तरिम संविधान संशोधन यायेगु विधेयक मन्त्रिपरिषदं पारित जुइधुंकूगु खँ न्ह्यथंनादिसें व्यवस्थापिका संसदया गतिरोध अन्त्य जुइवं विधेयक पारित यायेगु प्रकृयात सरकरां उच्च प्राथमिकता बीगु खँ च्वयादीगु दु ।
देय अत्यन्त संवेदनशील संक्रमणकालीन ईया परिस्थितिलय् नेपाःया अन्तरिम संविधान २०६३या संरक्षण व पालना यायेगु व याकेगु व उपराष्ट्रपति पदया गरिमाया रक्षा व लोकतन्त्रिक मूल्य एवं मान्यता कथं सर्वोच्च अदालतया आदेश कार्यान्वया यायेगु जिम्मेवारी संविधानसम्मत ढंग निर्वाह यायेत प्रधानमन्त्री नेपालं उपराष्ट्रिपति झायात इनाप यानादीगु खः ।
