नेपाः-भारत सीमाय् प्रदर्शन
येँ (सन्ध्या टाइम्स)/ भारतीय सीमा सुरक्षा बल एसएसबीया ज्यादती विरुद्ध थौं नवलपरासीया त्रिवेणी नाकाय् नेपाः व भारतया सिमानाय् स्थानीय जनतां धर्ना बिउगु दु ।
एसएसबीया सुरक्षा बलं नेपाली व भारतीय स्थानीय जनतायात आवश्यक सामग्री तकं हयेगु ज्यायात पनाः दुःख बियाच्वंगु धासें स्थानीय जनतां थौं अन धर्ना बीत्यंगु खः।
एसएसबीया ज्यादती विरुद्ध थौं भारतीय जनतां नं प्रदर्शनया तयारी यानाच्वंगु दु। लिसें भारतीय जनतां एसएसबीया ज्यादती विरुद्ध भारतीय राज्य विहारया चम्पारण जिल्लाया एसपीयात नं थौं ज्ञापनपत्र बीत्यंगु दु ।
नेपाः व भारतीय जनतां नवलपरासीया गण्डक नहरया ताँ जःखः च्वनाः थ्व प्रदर्शन यानाच्वंगु खःसा थुखे नेपाःमि जनतां नं अन प्रदर्शन यानाच्वंगु दु ।
नेपाः व भारतया त्रिवेणी नाकाय् निगुलिं पक्षया थःथितिपिं नं दुगु व थःथितिपिंथाय् वनेगु इलय् सीमा सुरक्षा बलया जवानतय्सं दुःख बीगु यानाच्वंगु खँ स्थानीय जनतां धाःगु दु।
भारतीय सुरक्षा बलं इलय् ब्यलय् नेपाःया भूभागय् वयाः दुःख बीगुया लिसें नेपाःया भूभाग अतिक्रमण यायेगु ज्या यानाच्वंगु द्वपं नं स्थानीय नेपाःमितय्सं बीगु याना वयाच्वंगु दु ।
एसएसबीया ज्यादतीयात भारतीय जनतां हे विरोध याःगु थ्व न्हापांखुसी खः ।
