स्वयम्भुया संरक्षण सुनां यायेगु ?

येँ (सन्ध्या टाइम्स)/येँदेय्या नांजाःगु बौद्ध स्मारक स्वयम्भुइ तामाङ जातिं नं संरक्षणया ज्या यायेगु धकाः नकतिनि नेपाल सरकार व ताम्सालिङ संयुक्त संघर्ष समिति दथुइ जूगु सहमति कार्यान्वयन मयायेत स्वयम्भु व्यवस्थापन तथा संरक्षण महासमितिं इनाप याःगु दु ।
महासमितिपाखें आः नकतिनि संस्कृति मन्त्री डा. मिनेन्द्र रिजालयात छगू ज्ञापनपत्र बिसें थ्व इनाप याःगु खः।
ऐतिहासिक स्वयम्भु महाचैत्य व स्वयम्भु लागाया संरक्षण यायेगु लागिं स्थानीय रुपं हे स्वनातःगु थीथी २४ गू संस्थात जानाः स्वयम्भु व्यवस्थापन तथा संरक्षण महासमिति गठन यानाः ज्या यानाच्वंगु व थ्व समितियात सरकारपाखें नं स्वीकृति दुगु कारणं अन हानं मेगु निकाय हयाः ज्या यायेम्वाःगु खँ महासमितिया ज्ञापनपत्रय् धयातःगु दु।
ताम्सालिङ व सरकार दथुइ जूगु थ्व सहमतिं धार्मिक स्थलय् राजनीतीकरण याकी धासें ज्ञापनपत्रय् थुकिया कार्यान्वयन याये मते धकाः इनाप यानातःगु दु।
सरकार व ताम्सालिङ दथुइ थज्याःगु सम्झौता २०६५ चैत्र २९ गते माओवादी सरकारया पालय् हे जुयाच्वंगु खःसा उकुन्हु उकियात कार्यान्वयन यायेगु खँय् जक सम्झौता जूगु खः ।