यँयाःबलय् नेवाः जागरण मञ्चया स्वयम सेवक
येँ (सन्ध्या टाइम्स)/नेवाः जागरण मञ्चया कवः नेवाः जागरण सुरक्षा मञ्चं थगुने थें थुगुसी नं नेवाःतय्गु तःधंगु जात्रा यँयाःबलय् थःगु सरोकार क्यनीगु जूगु दु ।
सुरक्षा मञ्चया ग्वसालय् म्हिगः जूगु सहलह ज्याझ्वलय् न्ववासें सुरक्षा मञ्चया प्रमुख राजेश्वर स्थापितं यँयाः जात्राय् न्यासःम्ह स्वयम् सेवक परिचालन यायेगु खँ कनादिल।
सुरक्षा मञ्चं यँयाःया न्हापांगु न्हि उपाकू कुन्हु लोडसेडिङ मयाकेत विद्युत प्राधिकरण, ट्राफिक व्यवस्थापनया निंतिं ट्राफिक प्रहरी कार्यालयय् ज्ञापनपत्र बीत्यंगु दु। अथे हे जात्राज्वःछि सुचुकुचु यायेत व कुमारी खः सालीगु लँपु भिंकेत महानगरपालिकायात ज्ञापनपत्र लःल्हाइगु जूगु दु ।
म्हिगः जूगु सहलह ज्याझ्वलय् नेवाः जागरण मञ्चया संयोजक सुजीब वज्राचार्यं नेवाःतय्गु तःधंगु जात्रा यँयाः जात्राय् नेवाःतय्गु सहभागिता दयेमाःगु व नेवाः स्वायत्त राज्यया अभ्यास न्ह्याकेमाःगु खँ कनादिल ।
ज्याझ्वलय् उच्चस्तरीय अध्ययन समितिया संयोजक पवित्र बज्राचार्यं थुगुसीया यँयाः जात्रा नाप सम्बन्धित गुथि व संघसंस्थायात संस्कृति मन्त्रालयपाखें माःकथंया ग्वाहालि यायेगु निर्णय जुइधुंकूगु खँ कनादिसें नेवाः सांस्कृतिक आन्दोलनयात न्हूकथं न्ह्याकेमाःगु बिचाः प्वंकादिल।
ज्याझ्वलय् इन्द्रजात्रा व्यवस्थापन समितिया सल्लाहकार मोहनकृष्ण डंगोलं नेवाःतय्सं तःधंगु आन्दोलन यायेमाःगु खँ कनादिसें थुगुसी जात्रा स्यंक आन्दोलन यायेगु मखुसें नेवाःतय् माग पूवंकेत आन्दोलन यायेमाः धयादिल।
नेवाः न्ह्यलुवाया संयोजक नरेशवीर शाक्यं नेवाः भूमिइ जुयाच्वंगु सांस्कृतिक अतिक्रमण चीकेत मञ्चं पहल यायेमाःगु खँ कनादिल ।
